"Perigo:

Isto vai collendo forma 

e xa non é un esbozo.

​

A cada mancha sobre o lenzo

ollando para ti

espido,

a cada pose enredada

de modelo favorito,

a cada postura 

contorsionista,

a cada noite de combate

na cama,

a cada espertar

apinochado,

a cada alento recuberto de sal

que che entrego

e que me dás

​síntome profundamente adicto.

Agarro os pinceis,

con forza,

e trémame o pulso 

de tanto sentirte

dentro de min.

​

Esta cobardía,

esta falta de tacto

para expresarme,

estes acrílicos que me enzoufan

de pracer 

e de medo

a sufrir

ameazan con encartar o meu cabalete.

​

¿Que fago?."

SOBRE O DESAMOR E OUTRAS MARICONADAS

Un poemario ilustrado para cicatrizar as feridas do mundo que nos toca vivir./

Un poemario ilustrado para cicatrizar las heridas del mundo que nos toca vivir.

1ª Edición 2013

© Toxosoutos S.L.

© Ricardo de Barreiro

Ilustracións/ilustraciones & textos

RdeB

Edición

Toxosoutos S.L.

Maquetación

Gráficas Sementeira

Impresión & encadernación/encuadernación

Gráficas Sementeira

Exemplares esgotados/ejemplares agotados

"Houbo un tempo

tolo,

tanto que voei por primeira vez

sen anestesia,

ata aterrar en Bélxica.

 

Houbo un sunami de calor.

Morreu xente derretida

en planetas extraños.

E eu,

espido,

derreténdome por ti,

amoseiche os meus frigo-pés

de pingüino,

e rícheste cos meus movementos

antárticos

entre tanta calor.

Mentres,

aplicadiño ti,

chupábasme

ata quedarme nun pauíño

con premio.

​

E a xente continuaba morrendo...

​

E Europa de luto.

E ti e máis eu

de alivio."